*** नाचती लोक सारे...

***
वृत्त---मालिनी
गण--- न न म य य
**

नकळत सुख येता, डोलती लोक सारे
कण कण भिजवाया, पाहती लोक सारे...
*
सत रज तम सारे, राहती अंतरी या
सबळ गुण जसा तै, भोगती लोक सारे...
*
परमसुख मिळेना, शोध घेती जयाचा
मग क्षणिक सुखाने, नाचती लोक सारे...
*
पळभर जगतांना, सर्व आयुष्य जाते
उधळत क्षण वाया, घालती लोक सारे...
*
तुजविण बघ रामा, कोण आहे दुजा रे !
मन तव भजनी ना, लावती लोक सारे...
*
क्षणभर दिसता तू, शब्द निःशब्द होतो
परि तुजच असे कां , विसरती लोक सारे...