*** अज्ञात प्रारब्धास ....

***

अज्ञात मुक्कामास मी माझा निवारा मानले,
अज्ञात प्रारब्धास या ,'त्याचा ' इशारा मानले...

मोजू कशाला वार जे,अंगावरी मी झेलले
मी जीवनाला माझिया,प्रेमळ उबारा मानले...

झिंगून जाता मी जरा,गर्वात डोलू लागलो
चपराक कानी बैसली,याला उतारा मानले...

नावेत पाणी माझिया,होते शिराया लागले
मी ज्या ठिकाणी थांबलो,त्याला किनारा मानले...

केसासही धक्का नसे,सांभाळले कोणी मला ?
आनंदलो, यालाच मी 'त्याचा' पहारा मानले ...

मागू कुणाला काय मी ! सारे विधात्याने दिले
हातून जे घडले कर्म ते,त्यासी चुकारा मानले.....