*** प्रेम कुणावर जडणेही

***
याचेच रडू आले की, जमले न मला रडणेही
आत धुमसले इतके की, थेंब विसरले झडणेही

कोंडून उमाळे सगळे, अधरातच होते जपले
जमलेच कुठे या माझ्या ओठांना ओरडणेही

पाहून मला त्या आल्या जोराच्या वादळलाटा
अंगाशी आले माझ्या ,मी अवचित सापडणेही

आवाज दिला मी जेव्हां,ऐकू न कुणाला आला
दुर्मिळ झाले आज मला माझ्या हाती पडणेही

आकार कसा मी देऊ, गेलेल्या आयुष्याला ?
बिघडून असे गेले की, अवघड झाले घडणेही

प्रेमाचा मंजुळ वारा,आल्हाद मनाला देतो
दुःखाचे कारण होते,प्रेम कुणावर जडणेही