*** रोज या नावापुढे

***
रोज या नावापुढे ताजेतवाने पाप आहे
तीच ती आहे निराशा, तोच पश्चात्ताप आहे

कोठला मुक्काम ऐसा ,आणला गेलो इथे मी
पावली प्रत्येक कां ,लाचार आपोआप आहे ?

लाख होते कष्ट केले ,चांगले केले जरी मी
माझिया पाठीवरी कां ,ना कुणाची थाप आहे ?...

बोलवा लाखो सुखाला,दुःख आपोआप येते,
हाच मोठा ताप आहे, हा खरा संताप आहे...

दुःख दारोदार आहे,द्वेष जागोजाग आहे
फावल्या कांही क्षणांना ,आसवांचा शाप आहे...
.
सोडता सा-या अपेक्षा,दूर जाई की निराशा
जीवनाचे मर्म आहे,दीन सेवा माप आहे....