*** रुसलास कां?..

***
सदर कविता "हरिणी" या अक्षरगणवृत्तात आहे.या वृत्तात १७ अक्षरे असून यती ६ व १० व्या अक्षरावर असते.
गण--- न-स-म-र-स-लग
***

परतुनि बघे जाता जाता,पुन्हा वळलास कां?
हुरहुर मनी तुझ्या वाटे,तरी रुसलास कां?..

तुजविण कशी राहू आता,स्वप्नी दिसलास तू
चटकन उशी ओली झाली,मनी बसलास कां?

कण कण असा झाला ओला,शुष्क क्षण वाटला
हिरवळ तुझी कुठे गेली,असा सुकलास कां?

सळसळ बरी केली होती अरे हृदयात तू
खळखळ झरा पाणावूनी, मनी उरलास कां?

मजजवळ ना माझे कांही, तुझी संपदा असे
नयन नयनी झाले सारे, असा बुडलास कां?..