*** तुझ्या मिठीने दिली उभारी

***
विवंचनेच्या कुशीत खोटे हसून गेलो
तुला समोरी बघून मी भरभरून गेलो

मलाच मी वाटलो ति-हाइत क्षणाक्षणाला
तुझ्याच स्वप्नात एवढा मी रमून गेलो

तुझा सुगावा कसा लागला मनास माझ्या !
अदृश्य झोक्यावरी खुशीने झुलून गेलो

तुझ्याच डोळ्यांत पाहिली मी असंख्य स्वप्नें
तुझ्यासवे सागरातही मी तरून गेलो

तुझ्याच हातावरी पहा मम ललाटरेषा
तुटून जाता पुन्हा पुन्हा मी जुळून गेलो

अखेर संजीवनी मिळाली जिवास माझ्या
तुझ्या मिठीने दिली उभारी,जगून गेलो