*** हाक येता सुखाची

*

हाक ही येता सुखाची ,कां धुके दाटून येते ?

टाकता थोडा उसासा,दुःख हे धावून येते...

आठवू आता कशाला,भूतकाळाचे खुलासे !

वर्तमानातील गोष्टी स्वप्न गुंडाळून येते .....

खेळ काळाचा बघा हा,पाहिजे तेव्हा मिळेना

चांदणे भासे दुपारी,रात्र अंधारून येते...

वाटुनी येता उदासी ,हुंदका दाटे गळ्याशी

लोचनी साठून तेव्हा, प्रेम ओथंबून येते...

पाहवेना दुःख परके,माझिया वेडया मनाला

सोबतीने ते दुजांच्या , आसवे ढाळून येते...