*** थेंब ज्यांनी गाळले...

***
एकदाचे दुःख आम्हा ,शेवटी कंटाळले
पाहुणा जाता नकोसा,दोन अश्रू ढाळले...

सोसतांना तोल जाता,हात स्नेहाने दिला
ते तुम्ही, ज्यांनी जिवाला नेमके सांभाळले ..

आपल्या प्रेमातली मी, खूप जादू पाहिली
कोण होतो,काय झालो? हे मनाशी चाळले...

माझिया श्वासात होती, आपली ती स्पंदने
फूल माझ्या आसवांचे मीच आता माळले...

जागता निर्धार माझा, ठाम आहे आज ही
जे दिले होते तुम्हाला,शब्द माझे पाळले...

सांत्वने केली मनाची,साथ मोलाची दिली
खूप आभारी तयांचा ,थेंब ज्यांनी गाळले...