*** मीच सामावून गेलो...

***
मी तुझ्या मौनात माझी उत्तरे शोधून गेलो
बोलले डोळे तुझे अन् सार मी जाणून गेलो...

बावळ्या प्रश्नांस होती ,गोड ओठांची अपेक्षा
मी तुझ्या डोळ्यांत सारी अक्षरे वाचून गेलो

माझियासाठी पुरेशी आठवांची ही शिदोरी
हुंदके घेऊन आलो , हृदय मी ठेवून गेलो...

कंठ होता दाटलेला,शब्द काहीही फुटेना
वाटला माझा अचंबा, मी कसा गाऊन गेलो !

हक्क घेण्याचा तुला अन् फक्त देणे काम माझे
मी तुझ्यावाचून नाही, हा तुझा होऊन गेलो...

मोहिनी तव लोचनांची काय सांगावी तुला मी ?
पापण्यांच्या आत तुझिया,मीच सामावून गेलो...