*** आज जोडून जा तू...

***
..प्रस्तुत कविता "मालिनी" या अक्षरगणवृत्तात लिहिलेली आहे.मालिनी वृत्तात न-न-म-य-य हे गण असतात, यती ८ व्या अक्षरावर असते..
*****

विचलित मन माझे,तार जोडून जा तू
धुन्द मधुर सुरांचा साज छेडून जा तू...

क्षणभर रमलेला डाव हा सोबतीचा
विसरुन मज आता, डाव सोडून जा तू ...

फुलत डुलत होती बाग मोहोरलेली
परिमळ उधळूनी ,गंध सोडून जा तू॥

सुखकर तव स्मृती कोरलेल्या किती या
हसत रुसत त्याना ,आज गाडून जा तू...

सजल नयन दोघे एक होऊन गेले
नकळत जुळलेले ,पाश तोडून जा तू...

क्षण क्षण जपलेले दूर होऊ पहाती
पळभर तुझियाशी, आज जोडून जा तू...