*** कबूल नाही...

***
सुकणे कबूल माझे,फुलणे कबूल नाही
त्यांना खुशीत माझे,असणे कबूल नाही...

माझे कसेबसे ते जगणे जगून झाले,
अद्यापही मला हे,मरणे कबूल नाही...

दुःखातल्या झळांना हासून साहले मी,
आता मला कधीही ,कुढणे कबूल नाही...

जाळून या जिवाला,अंधार दूर केला
अर्ध्यात दीपकाचे विझणे कबूल नाही...

उद्ध्वस्त जीवनाला जोडून ठेवले मी,
आता अशातशाने तुटणे कबूल नाही...

माथा नको तिथे मी,टेकून विद्ध झालो
रामाविना कुठेही झुकणे कबूल नाही....