*** आत माझ्या...

*
मी उमाळे कोंडले ओठात माझ्या,
कैद झाले सूरही श्वासात माझ्या....

खेळला माझ्यासवे तो खेळ बाका,
डाव नाही राहिला हातात माझ्या...

ऐकता आकांत माझ्या काळजाचा,
हुंदका कोंदाटला कंठात माझ्या ...

झोंबला बेफाम वारा कुंतलांना,
शांत आता झोपला केसात माझ्या...

वेचण्या जेव्हां निघाले आसवांना ,
श्वेत मोती सांडले पायात माझ्या...

खूप पडल्या अंगवळणी सर्व गोष्टी,
तंग झाली जोडवी बोटांत माझ्या ...

शांतता ढळते कधी का सागराची !
वादळे होऊन गेली आत माझ्या...